Иҭахаз ршьа утәуп-Рауф Дбар

Иҭахаз ршьа утәуп.

Амра кахха иԥхон . Руҭраҿы иҿырхыз ашәырқәеи ауҭраҭыхқәеи рыман илбаауан адәыӷба аанҿасырҭахьы. Иаԥсаны иҟаз хаҵеи ԥҳәыси аангыларҭаҿы иааит. Абилеҭқәа амысхуеит ҳәа дахьнеиз иаҳаит аибашьра ишалагаз . Иԥшәма дахьгылаз дынлыдгылан ус иҳәеит аибашьра алагеит . Ииҳәаз агәра лгару илымгару лзымдыруа лхаҵа днаиҿаԥшит. Амцҳәара зламыз Рауф Дбар иҿаԥшылара иаҳәеит зегьы. Ишзахәоз Гәдоуҭа иааит . Амашьына ишналбаазҵәҟьа рыҩны аҩналарҭаҿынтә ддәылҵуан Малиа Зураб иԥазаҵә Баграт .Уи ишьақәирӷәӷәеит аибашьра ишалагаз имҩагьы Ешыраҟа ишхоу. Рауф иҭаацәа аҩны иааныжьны, иҽеидкыланы аҩны дындәылҵит августа 14 рзы. Аибашьра ишалагаз еилкаахеит .Уахь ацарагьы иацыз арыцҳарақәа бзианы еилыскаауан. Аха сҿы ааихыхны умцан ҳәа иасымҳәеит .Уԥсадгьыл анбылуа , ужәлар аныршьуа , ахаҵа захьӡу аҩны тәашьас имаз схаҿы исзаагомызт. Рауф иҟаиҵашаз зхала изыӡбоз иакәын. Ианакәзаалакь сара сгәаанагарала дныҟәаӡомызт , уи сара ибзиаӡаны издыруан- лҳәеит Рауф Дбар иԥшәма Елона Дауҭиа -Дбар.

Дбар Рауф Константин -иԥа диит 1958 ш, лаҵара мза 23рзы Мгәыӡырхәа ақыҭан , еицырдыруаз аԥсуа ажьи иҭаацәараҿы . Рауф иаб Қажа ҳәа акәын дшырдыруаз. Уи иԥшәма Качариан-Дбар Ниусиеи иареи 8- ҩык ахшара рыхшеит .Қажа деиҭымын. Иаб ддырӡхьан иан дшыхәыҷыз дихԥсаахьан. Еиҭымрыла дшыҟаз , аҭаацәара далалеит. Саргьы , лҳәеит иԥшәма Ниусиа , Саб ддырӡхьан , сеиҭымын. Ҩны хәыҷык аарлаҳәа игылан .Махәҿала аколхоз аҟны аус уны ҳанхеит. Ҳхәыҷқәагьы рыбӷа рзеиҵымхуа адәы иқәмырԥшыкәан, аӡәы ҳҽеимырҵахакәан ҳҽеиқәҳаршәеит .Уажәы аҩны дуӡӡа гылоуп, амаҵурҭа ӷьазӷьазуа иавагылоуп. Ара аҷкәынцәа зегьы анеибгаз еидгыланы иҟарҵеит. Сыҷкәынцәа ыҟандаз аӡәгьы сиҳәаӡомызт …-дцәажәон Рауф иан Ниусиа. Дбар Рауф Мгәыӡырхәатәи абжьаратә школ далгеит.1977 шарратә уалԥшьа дахысуан Минск , ақалақь Борисово аҟны. Уаҟа иара БМП аҟны аоператор акукҩы(наводчик )ҳәа дыҟан. Аррантә даныхынҳә иман аҳаҭыртә дыргақәеи аџьшьаратә шәҟәеи. Урҭ иахьа иаб иҩны иҟоуп. Аибашьра иалагаанӡа аус иуан машьынаныҟәцаҩыс Бзыбтәи АТК аҟны. Дҭаацәаран . Димоуп аԥҳа .

Дбар Рауф аҩны дындәылҵны дцеит Гагратәи ахырхарҭахь . Иԥшааит абџьаргьы . Аха Гагра дахьыҟаз еиликааит Ешыра игылоу БМП оператор ақәкҩы дшаҭаху .Уи иаразнак аҷкәынцәа уахь дыргеит. Кәтышьха игылан БМП .Уаҟа иақәдыртәоз дыҟамызт. Мызкы ианазынаԥшуа ихабар аӡәгьы издыруамызт. Мгәыӡырхәа инхо Еныкь Ваниа Рауф иҩны дылбааны иреиҳәеит ицәымшәаразы , Ешыра дшыҟоу. БМП аномер аҭаацәа мызкы иназынаԥшуа адҵақәа наигӡон. Иара -лҳәеит Елона Гагратәи ахырхарҭаҿы еибашьра атәы еиҭеимҳәаӡеит, иҳазҳәозгьы дҟамлеит. Акызаҵәык Ԥсоу абираҟ анахадыргыла ауп аҩны данааи. Аибашьра еибашьроуп, ԥсшьара сыҟоушәа сцо-саауа сыбжьазаауа ” иҳәалон, узымаауазеи ҳәа аӡәы данҵаалакгьы!. Дбар Рауф Гагра ашьҭахь хатәгәаԥхарала Афон-Ешыратәи абатальион акомандир Аԥсны афырхаҵа Рафик Ҵкәуа иҟны . Рауф ацәажәара мыцхәы бзиа изымбоз аус аҿы зхы цәырымгаӡакәан илшоз назыгӡоз дырхыԥхьаӡалан.Аибашьраҿы ҩызцәаз имазгьы дызқәгәыӷуаз зыгәра игоз ракәын. Ианартәи ажәылареи марттәи ажәылареи дрылахәын. Урҭ раамышьҭахь акыр аамҭа ацәажәараҵәҟьагьы иҭахымызт.Иҭахаз ршьа уны аԥсадгьыл еиқуырхатәуп ҳәа реиҳәон иҩызцәа. Рауф иашьеицбы Гиви Дбар иузеиқәымкуаз , аибашьраҿы аџьабаа дуӡӡа баны зҩызцәа реиқәырхаразы зыԥсы иамеигӡоз еибашьҩын. Рауф цәгьала дицәшәон иашьеицбы. Уи дихьчар шиҭаху ибар ишигәамԥхоз дырны иҽааникылон. Ахԥатәи рашьа Борис аибашьра аҳәааҿы амашьына Град аиқәыршәареи ашьақәыргылареи дазкын. Рауф аҵыхәтәан дҵыкәкәо далагеит, игхеит , раԥхьа ишьҭан Каман аҭарцәра. Рашәара 28 рзы , 1993 ш.аҩныҟа иоурышьҭит Рауфраа. Урҭ идыруан ажәылара шыҟалоз, рҽеиҭаркырц , рыԥсы ршьарц. Рауф Гәдоуҭантә иԥҳа аашықәса зхыҵуаз Иулиеи иԥшәма Елонеи иани иаби рахь дцеит .Знапы хәыҷқәа рыла заб ихуда зҽакәзыршаз Иулиа дидҵомызт . Сбыцәцар ҳәа бшәома ? Ҳәа дынлазҵаалон иара. Иан , иаб аҩны иҟаз зегьы ибеит. Игәыбылра здыз рынхарҭа дынҭаԥшны дааит. Ахәылбыҿха Гәдоуҭаҟа дгьежьит . Рауф имҩа хан Каманҟа. Адырҩаҽны Афон еиқәшәон зегьы. Ԥхынгәы хәба рзы Каман аҭарцәра иалагеит . Аӷацәа ахьахырцаз аҭыԥаҿы ирӡбеит изҭаҭәашаз аҭабиа аҟаҵара. Ҩыџьа аишьцәа Гәбазааи, Гәлариаки , Рауфи аҭабиа зларжышаз ажыгақәа рыԥшааит , ааигәа ишьҭаз ақьырмыҭкәагьы ааганы ҵаҟа ршьапқәа ахьҭадыргыло ишьҭарҵарц еизыргон, ақьырмытқәа акыр еиқәырҵеит . Ари аҭабиа ахьыҟарҵоз уаҟа инхоз ашәаныуа иуҭраҿы акәын. Гәбазаа рҩыџьегь ақьырмытқәа ирышьҭалан ицеит . Агәлариа ихарамкәан игылаз амжәаҵлаҿы рабџьар ааныжьны , иҩызцәа днарышьҭалауан еиԥш, аҭабиа ажра иаҿыз Рауф ԥшьынтә еихсит.Иҩызцәа равтоматқәа нахьхьи амжәаҿы ихшьын. Еибгаз руаӡәк ажыгала уааҵәҟьа дыршьит ашәамахь . Аҭабиа ахьыржуаз иара иуҭраҿы акәӡаарын . Иара даанханы дыҟан, иҩны аҟынтә дкылԥшуазаарын. Рауф ҩбаҟа сааҭ иԥсы ҭан , ԥхынгәы 6 ахәылбыҿха иҭаацәа ираҳаит Рауф иҭахара . Рауф данҭаха , Мгәыӡырхәа данаарга аҽныҵәҟьа , иара гәыларала изааигәаз , ҭаацәашәала еибабоз , иқәыԥшыз Иура Еныкь иара ихаҭыԥан дышцоз нарылаиҳәеит. Еснагь иҭынчыз абраҟа ибжьы неиҵыхны иҳәеит. Иурагьы Шрома агараҿы дҭахеит .

Рауф Дбар дҭахеит 05.07.1993ш.Каман

Ианашьоуп” Агәымшәаразы ” амедал

Аибашьраҿы ахаҵара ӷәӷәа аазырԥшыз уи иашьа Гиви Дбаргьы машәырла дҭахеит. Уи изы иқытаҿы абас рҳәоит Гиви аибашьраҿы акәыџьма даҩызан. Шаҟаҩы ҭаирхаз хыԥхьаӡара амаӡамызт. Дласын , деилҟьан . Иааигәамԥхаз уҿаҿы иуеиҳәон . Анавагылара-аавагылара издырӡомызт ҳәа. Гиви дҭаацәаран. Аибашьраан ицеибашьуаз Шьазина Џьапуа- ԥҳаи иареи рыԥсҭаазаарақәа еиларҵеит. Дрымоуп аԥҳа. Ианашьоуп Агәымшәаразы амедал. Рауф бзиа иибоз иқыҭаҿы хазы иҵәҩан ахьаирсыз, ус иаанхеит .Аҵлақәа еиҭаиҳаз ахыӡӡааит ,,ауҭрагьы аҟаҵара ҳаҟәыҵит. Ацарақәа аарақәа цәгьахеит. Аӡәы симыҳәакәан схала дсааӡеит изхара ииымбаз иԥҳа Иулиа. Уи ААУ аиуристтә факультет далгеит. Аамҭала аус луӡом лҳәеит иԥшәма Елона Дауҭиа-Дбар.

Каман иҭахаз рбаҟа гылоуп. Иулиа лани лареи данҭахаз амш азын иаҭаауеит . Абраҟа ааигәара уажәыгьи еимамԥсаӡацт Рауф иижуаз аҭабиа. Ақьырмытқәагьы еиԥхьытта иҟажьуп. 20ш.рышьҭахь игылаз амжәаҵла хәыҷы уажәы аҽахарԥаны идуӡӡахан игылоуп , ашәшьыра ду ҟаҵо.

Лаб изку акы лывшәаны ицар ҳәа дшәошәа урҭ зегьы лаԥшыла еимылдоит Иулиа. Хара игыланы илыхәаԥшуа лан ихьу-хьууа хьаак ҿыцҳаҳараӡа лыҩнуҵҟа иааҿыхауеит . Рауф аҭынчра ззаигаз рзыԥхьаӡараҿы иҟоу иԥҳа Иулиагьы ԥшьаала лан лахь лҿыналхоит.